Сепак, студиите покажуваат дека луѓето што живеат со дебелина, ако намалат дури и малку од нивната телесна тежина може да имаат суштинско подобрување на здравјето.
Медицински одобрените пристапи за намалување на телесната тежина, покрај намалувањето на тежината, може да овозможат и одржување на пониска телесна тежина како дел од поздрав начин на живот.
Ако вишокот телесна тежина влијае на вашето здравје, може да почнете да работите на поздрава верзија од самите себе уште денеска!
Иако тежината што треба да се намали зависи од индивидуалната здравствена состојба на луѓето, медицинскиот став на здравствените работници е дека здравствените придобивки започнуваат да се забележуваат со намалување на тежината за 5% од почетната телесна тежина, а придобивките се зголемуваат со дополнително намалување на тежината. Намалувањето на почетната телесна тежина за ≥10 -15% се поврзува со дополнително подобрување на здравјето кај луѓето.
Оваа објава открива колку килограми треба да изгубите за да видите подобрување во одредени здравствени состојби поврзани со телесната тежина.
Ако сте загрижени за која било од споменатите состојби во оваа објава, разговарајте со вашиот лекар за медицинска процена и совет за терапевтска опција за третман на дебелината која ќе биде соодветна за вас.
Дури и мало намалување на вкупната телесна тежина може да има позитивно влијание на вашето тело. Ако не можете да замислите што претставуваат 5% намалување на телесната тежина, ајде да го ставиме овој број во контекст. Ако тежите 100 kg, вие треба да изгубите 5 kg за 5% намалување на телесната тежина.
Ова се очекуваните придобивки од намалувањето на 5% од вашата телесна тежина:
Со намалување на 5% од вашата вкупна телесна тежина, можете да го намалите ризикот од развој на хронични болести како што е дијабетес тип 2.
Преку програма за промена на начинот на живот одобрена од центрите за превенција и контрола на болести, луѓето кои намалиле 7% од телесната тежина го намалиле ризикот од развој на дијабетес тип 2 за 58%.
Истражувањата покажале дека кај луѓе што живеат со прекумерна телесна тежина или со дебелина, намалувањето на индексот на телесна маса (BMI) за 2 единици (намалување на телесната тежина во просек за 5,1 kg) резултира со намалување на ризикот од развој на остеоартритис за 50%.
Исто и кај возрасни луѓе што живеат со прекумерна телесна тежина или со дебелина, просечното намалување на телесната тежина за 5,7% резултира сo олеснување на болката во колената, подобрена подвижност и севкупно подобрување на функцијата на коленото.
Дополнително, кај учесниците што ослабеле повеќе, непријатноста врзана со симптомите на остеоартритис на колено продолжила да се намалува.
Прекумерната тежина и дебелината може да доведат до сериозни здравствени состојби и може да го зголемат ризикот од срцев удар, мозочен удар и васкуларни болести.
Фактори како што се крвниот притисок, холестеролот и нивото на гликемија може да предизвикаат срцеви болести. Поради тоа се препорачува намалување на телесната тежина за да се намалат кардиоваскуларните ризик-фактори.
Податоците покажуваат дека намалувањето на телесната тежина за 5 - 10% од почетната телесна тежина резултира со значително подобрување на HbA1c, триглицеридите, крвниот притисок и LDL-холестеролот.
Всушност, одржливото намалување на телесната тежина има исто влијание без разлика на почетната категорија на BMI (дебелина класа I, II или III).
Позитивниот резултат во подобрувањето на кардиоваскуларните ризик-фактори продолжува да расте со поголемо намалување на телесната тежина.
Дебелината се поврзува со активација на имуниот систем и со постоењето на хронично воспаление со низок степен. Ова може негативно да влијае на прогресијата на хроничните болести и на имунитетот поради инфекција.
Со систематски преглед на литературата дознавме дека намалувањето на телесната тежина кај луѓе што живеат со прекумерна телесна тежина или со дебелина може да доведе до помалку проинфламаторни маркери наречени цитокини во крвта. Ова може да има важна улога во справувањето со хроничните болести.
Истражувањата покажаa дека кај жени во постменопауза на кои им е пропишана хормонска терапија, постои значително зголемен ризик од развој на рак на дојката.
Сепак, во клиничко испитување кај жени во постменопауза што живеат со прекумерна телесна тежина или со дебелина, намалувањето на телесната тежина за 5% ја намалува серумската концентрација на естроген и други потенцијални биомаркери за рак на дојката. Оваа студија наведува дека мал степен на намалување на телесната тежина може да има забележителен ефект врз ризикот за рак на дојката.
Во посебна студија кај жени во постменопауза што живеат со прекумерна телесна тежина или со дебелина, намалувањето на нивната телесна тежина за 5% го намалува ризикот од инфламаторни биомаркери со потенцијална клиничка значајност во намалувањето на ризикот од рак.
Вишокот телесна тежина може да влијае на квалитетот на вашиот сон. Во истражување спроведено на Универзитетот Џон Хопкинс кај испитаници што живеат со прекумерна телесна тежина или со дебелина, забележани се проблеми врзани со спиењето, како што се:
Студијата открива дека намалувањето на севкупните телесни масти, поточно мастите во пределот на стомакот, биле најважни за подобрување на квалитетот на сонот кај испитаниците без разлика на демографските фактори.
Во студија на Универзитетот во Пенсилванија, возрасните луѓе што живеат со дебелина кои изгубиле 5% од нивната почетна телесна тежина ги подобриле времетраењето и квалитетот на сонот во период од 6 месеци. Луѓето кои на почетокот пријавиле умерени или поголеми симптоми на депресија, исто така, го подобриле нивното севкупно расположение на краток и долг рок.
Докажано е дека дебелината ја нарушува плодноста кај жените преку различни биолошки механизми.
Во една студија кај пациентки што живеат со дебелина и имаат полицистичен оваријален синдром, и применуваат нискокалорична исхрана, покажано е дека има подобрување во менструалниот циклус, овулацијата и плодноста. Во текот на студијата, кај испитаничките кои изгубиле 5% од нивната телесна тежина дошло до спонтана бременост. Авторите на студијата заклучуваат дека намалувањето на телесната тежина било ефективен пристап кај пациентки кои имале проблеми со плодноста, живеат со дебелина и имаат полицистичен оваријален синдром.
Во друга студија, 80% од жените што живеат со дебелина и со полицистичен оваријален синдром и изгубиле >5% од нивната тежина преку намален внес на храна богата со шеќери искусиле клинички значајни подобрувања во репродуктивната функција.
Вишокот масно ткиво произведува воспалителни медијатори кои влијаат на зглобните ткива, што може да доведе до зголемена воспалителна болка врзана со ревматоиден артритис.
Дебелината, исто така, за 47% ја намалува веројатноста за постигнување одржлива ремисија (намалување или исчезнување на знаците и симптомите на болеста) како одговор на антиревматската терапија.
Во ретроспективна студија, истражувачите ги анализирале податоците од пациенти со ревматоиден артритис за период од неколку години. Најголем дел (67%) биле со прекумерна телесна тежина или со дебелина. Клинички значајно намалување на телесната тежина (≥5 kg) е поврзано со значително подобрување на ревматоидниот артритис, вкочанетоста на зглобовите, болката и функционалноста.
Истражувачите во студијата забележале дека намалување на кое било количество од телесната тежина имало придобивки кај испитаниците. Врската меѓу намалувањето на телесната тежина и намалената активност на болеста е дозно-зависна, што дава позитивни ефекти врз вкочанетоста на зглобовите, болката и функцијата со поголемо намалување на тежината.
Забележано е дека намалувањето на телесната тежина ги подобрува хистолошките карактеристики за неалкохолниот стеатохепатитис. Со 5% намалување на телесната тежина, се изразува позитивниот резултат.
Во текот на 52-неделна студија, пациентите со неалкохолен стеатохепатитис кои ослабеле, искусиле забележливо подобрување на здравјето. Четвртина од испитаниците постигнале резолуција (минимална вредност на резултатот за воспаление (0-1) и без зголемување на клетките на црниот дроб) на стеатохепатитисот, 47% го намалиле резултатот за активност на неалкохолното замастување на црниот дроб, a кај 19% е забележана регенерација на фиброзното ткиво на црниот дроб.
Најголемите придобивки биле забележани кај пациенти кои изгубиле 10% или повеќе од нивната просечна телесна тежина, вклучително и најголема стапка на намалување на активноста на неалкохолниот стеатохепатитис, резолуција на неалкохолниот стеатохепатитис и регресија на фиброзата.
Забележано е дека намалувањето на телесната тежина за 5% го намалува процентот на масти во црниот дроб. Луѓето што постигнале намалување на телесната тежина за ≥10% имале најголемо намалување на неалкохолниот стеатохепатитис, регресијата на фиброзата, а дури 90% покажале резолуција на неалкохолниот стеатохепатитис.
Иако намалувањето на почетната телесна тежина за 5% може да има значителен ефект врз здравјето, овие придобивки продолжуваат да се зголемуваат со понатамошното намалување на телесната тежина. Неодамнешна студија ги анализира податоците на повеќе од половина милион возрасни луѓе што живеат со прекумерна телесна тежина или со дебелина во Велика Британија.
Во кохортна-студија за намалувањето на телесната тежина, испитаниците имале средно намалување на тежината од 13%. Под претпоставка дека BMI пред намалувањето на телесната тежина бил 40 kg/m2, ова резултира со намалување на ризикот од дијабетес тип 2 (41%), апнеја во текот на спиењето (40%), хипертензија (22%), дислипидемија (19%) и астма (18%).
Една студија покажува дека испитаниците кои изгубиле 10 -15% од нивната почетна телесна тежина, имаа клинички значајно подобрување на крвниот притисок.
Во студијата, испитаниците со прекумерна тежина или со дебелина и дијабетес тип 2 постигнале просечно намалување на систолниот крвен притисок за 9 mmHg. Испитаниците, исто така, имаа придобивки од значителното подобрување на другите ризик-фактори за кардиоваскуларни болести.
Мета-анализа извршена на повеќе рандомизирани контролирани клинички студии покажува дека намалувањето на 1 kg телесна тежина е поврзано со намалување на крвниот притисок за приближно 1 mmHg. Ова ја нагласува важноста на намалувањето на телесната тежина во превенцијата и третманот на хипертензија.
Намалувањето на телесната тежина за помалку од 15% го олеснува намалувањето на концентрацијата на „лошиот“ LDL-холестерол, триглицеридите и нивото на вкупниот холестерол.
Мета-анализа извршена на повеќе од 70 рандомизирани контролирани клинички студии покажува дека намалувањето на телесната тежина преку различни интервенции (начин на живот, фармаколошки третман и хируршки третман) е поврзано со статистички значајни промени во нивото на серумските липиди.
Додека намалувањето на телесната тежина за 5% може да му помогне на вашето срце, поголемото намалување на телесната тежина води до дополнително подобрување на здравјето на срцето преку намалување на нивото на шеќерот во крвта и нивото на холестеролот.
Во клиничка студија спроведена кај возрасни луѓе што живеат со прекумерна телесна тежина или со дебелина, количината на изгубените килограми се поврзува со подобрување на ризик-факторите. Испитаниците кои изгубиле >10% од нивната телесна тежина искусиле значително поголемо подобрување на гликемијата, триглицеридите, вкупниот холестерол и LDL-холестеролот, за разлика од пациентите кои изгубиле помалку телесна тежина.
Преваленцата на симптомите на ГЕРБ се подобрува со намалување на тежината за ≥10% кај мажите, односно за 5-10% кај жените.
Поради високата преваленца (37%) на симптоми на ГЕРБ кај луѓето што живеат со прекумерна телесна тежина или со дебелина, истражувачите забележале дека намалувањето на телесната тежина може да предизвика целосно повлекување на симптомите.
Во клиничка студија изведена кај пациенти што живеат со дебелина и со остеоартритис на колено, просечно намалување за 13,5% од нивната почетна телесна тежина резултирало со забележливи придобивки, влучително:
Пациентите изјавиле дека забележале подобрување на севкупното движење и намалување на болката при физичко движење. Оттука, истражувачите наведуваат дека намалувањето на телесната тежина дава вредни придобивки кај пациентите со остеоартритис на колено и дебелина.
Во рандомизирана клиничка студија за ефектот на диетите за брзо слабеење кај луѓето со остеоартритис на колено, истражувачите утврдиле дека намалување на телесната тежина за 10% ја подобрува физичката функција за 28%.
Развојот на одредени типови рак, вклучително колоректален, рак на панкреасот, бубрезите, јајчниците и постменопаузалниот рак на дојка, се поврзува со вишокот телесни масти.
Студија која следела жени во постменопауза открива дека намалување на повеќе од 9 kg од нивната почетна телесна тежина го намалува ризикот за одредени типови рак, вклучително рак на дојката, ендометријален рак и рак на дебелото црево. Вкупното намалување на стапката на инциденцата за каков било рак било 11% во споредба со испитаници кои не постигнале намалување на телесната тежина од 9 kg.
Истражувачите го поврзале повисокиот BMI со нарушување на квалитетот на сексуалниот живот, особено кај жени и кандидати за гастричен бајпас.
Луѓето што живеат со дебелина кои изгубиле просечно 13% од телесната тежина пријавиле значително подобрување во нивниот сексуален живот. Учесниците изјавиле дека се чувствуваат поатрактивно и имаат посилна сексуална желба. Повеќето од подобрувањата биле забележани во првите три месеци, откако учесниците изгубиле просечно 11,8% од телесната тежина.
Беше спроведена студија за ерективната функција кај мажи што живеат со прекумерна телесна тежина или со дебелина кои имаат дијабетес тип 2. Кај учесниците е спроведена интервенција за намалување на телесната тежина за 9,9%. Поголем број од овие учесници ја одржале или ја подобриле нивната ерективна функција за време на студијата.
Студија кај жени што живеат со дебелина и имаат дијабетес тип 2 покажува дека интензивна интервенција која се однесува на промена на начинот на животот со намалување на телесната тежина за приближно 7,0 kg ја подобрила нивната сексуална функција.
Истражувачи проучувале жени во менопауза кои учествувале во нутриционистичкa програма, направена да го намали внесот на масти преку храната и да го зголеми внесот на овошје, зеленчук и влакна.
Жените кои изгубиле барем 10% од нивната телесна тежина имале поголема веројатност да ги намалат или да ги елиминираат менопаузалните симптоми како што се топли бранови и потење во текот на ноќта за период од една година.
Истражувачите забележале дека намалувањето на телесната тежина и здравиот начин на живот се чини дека се добар алтернативен пристап за хормонската терапија која се користи за ослободување од постменопаузалните симптоми.
Намалување на телесната тежина често се препорачува како третман за опструктивна апнеја во текот на спиењето. Опструктивната апнеја во текот на спиењето е потенцијално сериозна состојба која понекогаш може да предизвика запирање на дишењето во сон.
Истражувачи следеле луѓе со опструктивна апнеја во текот на спиењето кои имаат дијабетес тип 2 и откриле дека сериозноста на опструктивната апнеја во текот на спиењето се намалила како резултат на намалување на телесната тежина. Испитаниците кои намалиле 10 kg или повеќе (приближно 10% од просечната телесна тежина на сите испитаници) искусиле поголемо намалување на симптомите на опструктивна апнеја во текот на спиењето. Тие заклучиле дека промената на телесната тежина доведува до подобрување на симптомите на опструктивната апнеја во текот на спиењето.
Друга студија открива дека намалување на телесната тежина за 10% било ефикасно во справување со нарушеното дишење за време на спиењето кај испитаниците, што доведува до помирен сон во текот на ноќта.
Намалувањето на телесната тежина може да доведе до помалку епизоди на уринарна инконтиненција.
Жените што живеат со дебелина и уринарна инконтиненција покажале забележително подобрување по 6-месечна програма за намалување на телесната тежина, којашто вклучувала исхрана и физичка активност.
По просечно намалување на телесната тежина од 8%, беше забележано намалување на фреквенцијата на епизодите на уринарната инконтиненција за 47% , споредено со 28% во контролната група.
Генералниот заклучок е дека повеќе жени од групата во која се постигнало намалување на телесната тежина пријавиле клинички значајни исходи. Во некои случаи беше забележано 70% намалување на вкупниот број епизоди на инконтиненција, стрес-инконтиненција и ургентна инконтиненција.
Истражувачите заклучија дека намалувањето на уринарната инконтиненција потенцијално може да биде придобивка од умереното намалување на телесната тежина.
Прекумерната тежина е негативно поврзана со когнитивните функции.
Слично, дебелината во средните години од животот се поврзува со зголемен ризик од деменција и Алцхајмерова болест.
Ако жени во постменопауза што живеат со дебелина почнат шестмесечна диета и намалат просечно 9,2% од нивната телесна тежина, истражувачите забележале значително подобрување на нивната епизодна меморија.
За оние што можат да направат големи, одржливи промени во начинот на животот, здравствените придобивки може да бидат исто толку големи и одржливи.
Одржливото намалување на телесната тежина подразбира посветеност на нови навики и начин на однесување.
Сепак, дополнителните придобивки од поголемо намалување на телесната тежина може да бидат корисни во зависност од вашите лични грижи. Обратете се кај вашиот лекар за медицинска процена и информации за достапните терапевтски опции за намалување на телесната тежина.
Намалувањето на телесната тежина за 15% може да помогне во:
Намалување на телесната тежина за 5 -10% може да доведе до помалку имунолошки клетки кои предизвикуваат воспаление, а поголемо намалување доведува дури и до поголеми подобрувања.
Клиничко испитување го испитувало ефектот на намалувањето на телесната тежина врз имуните клетки кај луѓе со BMI над 35 kg/m2 и дијабетес тип 2 или предијабетес. Испитаниците изгубиле просечно 13,5% од нивната телесна тежина, покажувајќи подобрување на антиинфламаторната имунолошка рамнотежа.
Од следењето на жени во постменопауза кои живеат со прекумерна телесна тежина или со дебелина, кои изгубиле повеќе од 15% од нивната телесна тежина е откриено дека нивното ниво на витамин Д се зголемило три пати во текот на студијата.
Оваа промена настанала независно од нивниот специфичен, индивидуален внес на храна. Витаминот Д (молекула што се раствора во масти) помага во намалувањето на воспалението и влијае на растот на клетките и имунолошката функција.
Во студија што е спроведена на Институтот по медицина на Универзитетот во Гетеборг, истражувачите следеле возрасни луѓе што живеат со дебелина во просечен период од 10,9 години.
Испитаниците изгубиле просечно 18,3% од нивната телесна тежина како резултат на хируршки третман, што довело до 24% намалување на морталитетот во текот на студијата.
Студија докажала дека луѓето што живеат со дебелина почесто покажуваат поголема потреба за висококалорична, вкусна храна во текот на денот.
Ова доведува до зголемен внес на храна како што се хамбургери, пица и слатки, особено во периоди кога не би требало да се внесува храна.
Во друга студија кај жени што живеат со прекумерна телесна тежина или со дебелина се забележуваат слични наоди. Сепак, испитаниците биле изложени на когнитивна бихејвиорална терапија и изгубиле просечно 14,6% од нивната телесна тежина. По терапевтскиот период, жените забележале намалена склоност кон слатка храна, што довело до нормализиран одговор во однос на тоа колку вкусна ја чувствуваат храната.
Додека ризик-факторите за одредени хронични болести се намалуваат со умерено намалување на телесната тежина, сепак постојат и други придобивки што може да се постигнат.
Здравствените фактори како што се крвниот притисок и нивото на липиди во крвта имаат линеарна врска со намалувањето на телесната тежина.
Поголемо намалување на телесната тежина може да ги подобри здравствените маркери поврзани со хроничните болести, намалувајќи го ризикот од состојби како што се срцеви заболувања, мозочен удар и дијабетес.
За да си дадете најголема шанса себеси за да се ослободите од симптомите на состојби како што се опструктивна апнеја во текот на спиењето и неалкохолен стеатохепатитис, треба да намалите 10 -15% од вашата телесна тежина.
Ако имате вишок килограми или живеете со дебелина, малите чекори може да бидат одличен почеток. Умерено намалување на телесната тежина можe да даде веднаш видливи придобивки за вашето здравје.
За оние што страдаат од повеќе здравствени состојби, придобивките може да се забележат со намалување на телесната тежина за 5%. Дури и со намалување на 2-3% од телесната тежина, медицинските експерти може да предвидат подобрување на нивото на холестеролот и намалување на ризикот од дијабетес.
Подобрување на здравјето продолжува со понатамошно намалување на телесната тежина. Тука ги наведовме терапевтските придобивки што може да ги забележите при секое ниво на намалување на телесната тежина.
Здравствени придобивки од 5% намалување на телесната тежина
Здравствени придобивки од 10% намалување на телесната тежина
Здравствени придобивки од 15% намалување на телесната тежина
Не постои брзо решение за намалување на телесната тежина. Како што напредувате на вашиот пат кон намалувањето на телесната тежина, покажете трпеливост и долготраен начин на размислување. Здравјето не e единствено дефинирано со број на вагата.
Повеќето од поврзаните здравствени придобивки се случуваат постепено во текот на повеќе години. Здравјето е долготраен начин на живот, а не спринт до крајот.
Може да искусите големи и непроценливи придовики што се однесуваат на квалитетот на животот, проследени со постепено ублажување на здравствените проблеми.
Иако може да е тешко да се изоди патот до поздрав начин на живот, сетете се - тој пат од илјадници километри започна со еден мал чекор. Покажете дека малите промени што ги правите сега, може да имаат огромен ефект во иднина.
Ако здравствените придобивки од намалувањето на телесната тежина почнат да ви имаат смисла, сметајте дека одовде може да го почнете вашиот пат кон намалување на телесната тежина.
